|
20 de agosto de 2008
Ver resultados
|
| Así son eu. José López Orozco. Alcalde de Lugo |
| Sabía vostede que José López Orozco nadou nun mar de tabeiróns e que o seu actor favorito é o mesmo Marlon Brando? Se quere descubrir máis datos do noso alcalde, siga lendo. |
José López Orozco naceu hai 59 anos nunha familia humilde e traballadora. Marchou estudar Filosofía e Letras a Salamanca e fixo os cursos de doutoramento na Universidade de Santiago. Está casado e ten dúas fillas.
Di que os seus amigos lle chaman Pepe, os alumnos (é profesor en excedencia no instituto lugués Lucus Augusti) chamábanlle Aristóteles. E debe ser porque é moi bo orador. E falador tamén, se lle pides que se defina nunha soa palabra, emprega tres. Considera que é bo amigo (os seus amigos confirman este dato), traballador (tamén confirmado) e un namorado de Lugo. Isto último queda patente se falas dous minutos con el.
No seu tempo libre pasea pola cidade, é doado atopalo pola Praza Maior ou na Praza do Campo, di que esa é unha zona que lle trae moi bos recordos, por alí saía cos amigos.
 Orozco é un home sinxelo, tal e como aparenta. Os que o critican, din que é populista e para el é un orgullo que o consideren defensor dos intereses e aspiracións do pobo. Estar coa xente e traballar conxuntamente por mellorar a súa cidade, Lugo, é o seu soño. Cando Lugo mellora el é feliz.
Por iso recoñece que está contento e tranquilo, traballa no que lle gusta e iso manteno ilusionado na política. De feito, é o político máis valorado de Galicia pola cidadanía.
Di que a súa maior preocupación neste momento é que chegue a paz a España e que se acabe co terrorismo.
Para o Alcalde de Lugo a cidade mellorou en múltiples aspectos e iso, di, débese ao traballo conxunto de todos os lucenses.
Orozco ademais é un amante das novas tecnoloxías, o ordenador e calquera medio de comunicación coa xente da rúa é benvido no seu día a día. É un amante da liberdade de expresión, quere que a xente diga sempre o que pensa, esa é unha regra inamovible na súa vida.
Ri e chora coa mesma facilidade e vive a política coa relaxación que lle da a experiencia, di que non ten bolboretas no estómago antes dun mítin. O que non entende é que algúns políticos empreguen a estratexia da mentira para desprestixiar ao contrario. Di que el nunca foi así, sempre tratou de atopar algo bo na oposición.
Gústalle que a xente o vexa como unha persoa próxima, así é el, e di que só promete aquelo que pode facer, por iso fai o que promete.
Un vicio inconfesable? Pois si, tamén ten un: a comida. Di que lle encanta comer, pero que un dos seus pratos favoritos é a ensalada, así que pensa que cando se reencarne será en coello.
José López Orozco ten os ollos marróns, calza un 44 e cre nas posibilidades de mellora que ten unha cidade coma Lugo. “Non está todo feito” -repite sen parar- “por iso me presento de novo”. Dende logo forza e ilusión non lle faltan, e o mellor, é que está tolo por Lugo.
 Video
|
|
